Монгол улсын Ерөнхийлөгч Ц.Элбэгдоржийн санаачилсан "Шилэн дансны хууль”  2015 оны нэгдүгээр сарын 1-нээс хэрэгжиж эхэлсэн. Тодруулбал,  Төрийн яам, агентлаг, аймаг, нийслэл, сум дүүрэг, тосгоны сургууль, цэцэрлэг зэрэг бүхий л шатны төсвийн 5000 эрх захирагч, төрийн болон орон нутгийн оролцоотой компани, улсын үйлдвэрийн  газар зэрэг 360 байгууллагаас гадна 10 сая төгрөгөөс дээш үнийн дүнтэй хийгдэж байгаа төсвийн хөрөнгө оруулалт, төсөл, ажил үйлчилгээ гүйцэтгэж байгаа аж ахуйн нэгж байгууллага Шилэн дансны тухай хууль, журамд заасан мэдээллийг цаг тухайд нь олон нийтэд мэдээлж байх үүргийг хүлээж байна.
         Энэ хуулийг танилцуулах, хуулийн хэрэгжилтийг хангаж ажиллах зорилгоор аймгийн төрийн болон төсөвт байгууллагын дарга, эрхлэгч, нягтлан бодогч нар болон бүх сумдын удирдлагуудыг оролцуулан сургалт зохион байгууллаа. Сургалтаа Сангийн яамны холбогдох мэргэжилтнүүд болон аймгийн ЗДТГ-ын СТСХ-ээс мэдээлэл, заавар зөвлөгөө өгсөн юм.
            Уг хууль нь төрийн болон орон нутгийн өмчөөр бараа, ажил үйлчилгээ худалдан авах зэрэг бүх мэдээлэл ил тод болж, төрийн ажиллагааг ард иргэд хянах бололцоо бүрдэж, төрийн үйл ажиллагааг нээлттэй, тунгалаг болгох зорилготой аж.