Эрүүл мэндийн яамнаас Төв аймгийн Эрүүл мэндийн салбарт өнгөрсөн онд 3.1 тэрбум төгрөгийн хөрөнгө оруулалт хийсний нэг томоохон ажил бол стандартын шаардлага хангасан, тоног төхөөрөмжийн иж бүрэн тохижилт бүхий “Мэс заслын вакум өрөө” юм.

Мэс заслын вакум ариун өрөө гэдэг нь өрөөний агаарт байх тоосонцор, жижиг биетийн хэмжээ, тоо ширхгийг агаарын чанарын зөвшөөрөгдсөн утганд байлгах зорилготой, агаарын урсгалын цогц систем бүхий битүүмжлэгдсэн байгууламж ажээ. Ингэснээр мэс заслын дараах шархны эрсдэл багасах, өвчний аюулгүйн байдал хангагдах, эмч сувилагч нарын ажиллах нөхцөл сайжирч буй хэрэг юм.

Уг ажлыг “Мед-Буян” ХХК 1,2 тэрбум төгрөгийн төсөвт өртгөөр хийж гүйцэтгэн БНСУ-ын үйлдвэрлэгчийн материал, тоноглолуудаар Олон улсын Class 1000 стандартыг хангасан вакум ариун өрөөг угсарч, суурилуулан өнөөдөр Төв аймгийн Нэгдсэн эмнэлэгт хүлээлгэн өглөө. Вакум өрөө нь нийт ариун 2 өрөө, энгийн 1 өрөө, мөн тасгийн орчин үеийн тохижилтыг хамт хийжээ.

“Мэс заслын вакум өрөө”-ний нээлтэд Монгол УИХ-ын гишүүн засгийн газрын гишүүн, Эрүүл мэндийн сайд Т.Мөнхсайхан, Эрүүл мэндийн яамны харьяа төрөлжсөн мэргэжлийн эмнэлгүүдийн удирдлагууд, Аймгийн удирдлагууд, Нэгдсэн эмнэлгийн хамт олон оролцлоо.

Сүүлийн жилүүдэд нийгмийн нэн чухал салбар болох эрүүл мэндийн салбарт хөрөнгө оруулалт нэмэгдэж байгаа нь хүн амд үзүүлэх эрүүл мэндийн тусламж үйлчилгээ сайжирч, иргэдийн дундаж наслалт өссөн, зонхилон тохиолдох өвчний эрт илрүүлэг улсын дунджаас дээгүүр байгаа зэрэг тодорхой үзүүлэлтүүдээс харагдаж байгааг албаны хүмүүс онцоллоо.