Төв аймгийн ЗДТГ, Зуунмод сумын ЗДТГ, Эрүүл мэндийн газар, Нэгдсэн эмнэлэг, Өрхийн Эрүүл мэндийн төв, Нийслэлийн “Шүд, эрүү нүүрний төв” хамтран “Эрүүл шүд-Эрүүл Зуунмодчууд” аяныг эхлүүллээ. Тус аяны нээлтэд аймгийн Засаг даргын орлогч Г.Сурмаа, аймгийн ИТХ-ын нарийн бичгийн дарга Ч.Жавзанпагма, Нийслэлийн шүд, эрүү нүүрний төвийн дарга Д.Долгормаа, Зуунмод сумын Засаг дарга Ч.Сарангэрэл болон бусад албаны хүмүүс оролцлоо.

Аяны хүрээнд нийслэлийн “Шүд, эрүү нүүрний төв”-ийн нарийн мэргэжлийн эмч, мэргэжилтнүүд урьдчилан сэргийлэх үзлэг, зөвлөгөө, эмчилгээ, хиймэл шүдний хэв авах /бэлэн болсон шүдийг Шүд, эрүү нүүрний төвөөс очиж авах/, эрүү нүүрний гажиг заслын эмчийн үзлэг, рентген оношилгоо, шүд ломбодох, шүд авах зэрэг үйлчилгээг иргэдэд үзүүлэх юм. Үзлэг, оношилгоо, эмчилгээ энэ сарын 05-ны өдрийг дуустал /амралтын өдрүүдэд/ үргэлжлэх бөгөөд иргэдийн хувьд Эрүүл мэндийн даатгал сүүлийн таван жил төлсөн байх, 2023 онд гурван шүдэнд даатгалаар эмчилгээ хийлгээгүй байх шаардлагатай. Дашрамд дурдахад Төв аймгийн “Шүд угаалтын аварга шалгаруулах олимпиад”-ыг анх удаа 2023.11.06-ны өдөр Зуунмод суманд зохион байгуулахаар шийдвэрлэжээ. 

Энэ үеэр аймгийн Эрүүл мэндийн газрын дарга С.Мөнхтуяа, Нийслэлийн Шүд, эрүү нүүрний төвийн дарга Д.Долгормаа нар Хамтын ажиллагааны гэрээнд гарын үсэг зурлаа