Монгол Улсын Их Хурлын 2019-2024 оны стратеги төлөвлөгөөнд Аймаг Нийслэл сум дүүргийн ИТХ-ын дэргэд Улсын Их Хурлын үйл ажиллагааг сурталчлах төв байгуулж, иргэдэд хууль эрх зүйн мэдлэг олгох, хууль тогтоомжийг сурталчлах ажлыг үр нөлөөтэй зохион байгуулах, ЕБС-ийн сурагчид их дээд сургуулийн оюутан залууст зориулсан Парламентын боловсролын хөтөлбөрийг боловсруулан хэрэгжүүлэх зэрэг зорилтуудыг дэвшүүлсэн байдаг.

Өнгөрсөн хугацаанд Хууль тогтоомж сурталчлах төвийг Баянхонгор Өвөрхангай аймгуудад байгуулсан бол өнөөдөр /2023.8.2/ Дархан-Уул аймгийн ИТХ-ын дэргэд байгуулж нээлтээ хийлээ.

Уг төвийг Улсын Их Хурлын тамгын газар, Засгийн газрын хэрэг эрхлэх газар, Дархан-Уул аймгийн ИТХ, Швейцарын хөгжлийн агентлаг хамтран байгуулж түүгээрээ дамжуулан УИХ-ын Ерөнхий нарийн бичгийн дарга Л.Өлзийсайхан Дархан-Уул аймгийн ИТХ-ын дарга С.Насанбат нар хамтран ажиллах санамж бичигт гарын үсэг зурлаа.

Энэхүү төв байгуулагдсанаар иргэдэд батлагдсан хууль тогтоомжтой танилцах боломж нэмэгдэхийн зэрэгцээ хууль тогтоох үйл явцад оролцох иргэдийн оролцоо сайжирч , иргэд санал бодлоо илэрхийлэх, хууль тогтоомжтой холбоотой сэдвээр төрөл бүрийн сургалт сурталчилгааны ажилд оролцох боломж бий болж байна.