Аймгийн ЗДТГ, ИТХ-ын албан хэрэгцээнд ашигладаг автомашинуудын дугаарууд болох 0001 АРА, 0002 АРА, 0003 АРА, 0004 АРА улсын бүртгэлтэй дугааруудыг дуудлага худалдаагаар борлуулах шийдвэр гарлаа.

Аймгийн Засаг дарга М.Батжаргал энэхүү санаачилгаа өнөөдөр /9.11/ аймгийн Онцгой комиссын гишүүдэд танилцуулж батлуулсан юм.

Автотээврийн хэрэгслийн бүртгэл хөтлөх, улсын дугаар олгох журмын дагуу дээрх улсын дугааруудыг дуудлага худалдаагаар борлуулж олсон орлогоор аймгийн Нэгдсэн эмнэлэгт алсын зайны дуудлагад явах тусгай тоноглолтой автомашин худалдан авахаар болжээ.

Алсын зайны дуудлагад явах тусгай тоноглол бүхий автомашин манай аймагт байдаггүй бөгөөд энэхүү санаачлагыг Онцгой комиссын гишүүд, мэргэжлийн байгууллагууд талархан хүлээн авсан юм.

Дуудлага худалдааг нээлттэй явуулах тул эрүүл мэнд, хүмүүнлэгийн үйлсэд зориулагдах энэхүү үйл ажиллагаанд Архангай аймгийн ард иргэд, урлаг соёл, спортын нөлөө бүхий хүмүүсийг идэвхийлэн дэмжихийг Онцгой комиссын гишүүд уриалж байлаа.