Аймгийн Иргэдийн Төлөөлөгчдийн Хурлын Ажлын алба нь УИХ-ын Тамгын газар, НҮБ-ын хөгжлийн хөтөлбөр, Швейцарын хөгжлийн агентлагийн хамтран хэрэгжүүлж буй “Монгол улсын төлөөллийн байгууллагыг бэхжүүлэх нь” төсөлтэй хамтран  2021 оны 03 дугаар сарын 15-ны өдрөөс 04 дүгээр сарын 12-ны өдрүүдэд 27 сумын ИТХ-ын төлөөлөгч нарт  сургалт зохион байгуулахаар хөтөлбөр, хуваарийг батлан ажиллаж байна. 
 Сургалтыг 27 сумдад танхимаар зохион байгуулахаар төлөвлөсөн ч аймгийн төв Зуунмод суманд короновируст цар тахал бүртгэгдэж өндөржүүлсэн бэлэн байдлын зэрэгт шилжүүлсэнтэй холбогдуулан Алтанбулаг, Аргалант сумдын Төлөөлөгч нарт хийх сургалтыг 03 дугаар сарын 15-ны өдөр цахимаар зохион байгууллаа. 
 Өнөөдрийн сургалтад сумын ИТХ-ын дарга, Нарийн бичгийн дарга, Төлөөлөгч нийт 35 хүнийг хамруулж, Монгол улсын Засаг захиргаа, нутаг дэвсгэрийн нэгж, түүний удирдлагын тухай хуулийн шинэчилсэн найруулга, Захиргааны ерөнхий хууль, орон нутгийн төсвийн удирдлага, байгаль орчны төлөвлөлт, санхүүжилт сэдвээр явууллаа. 
 Энэхүү сургалт нь орон нутгийн сонгуулийн үр дүнгээр шинээр сонгогдсон Төлөөлөгч нарт хууль эрх зүйн мэдлэг олгох, тэднийг чадавхжуулах, сумын ИТХ-д хуулиар олгогдсон эрх үүргийг хэрэгжүүлэхэд ИТХ-ын төлөөлөгчдөд шаардлагатай суурь мэдлэгийг олгох, практикт гарч байгаа хүндрэлийг шийдвэрлэх арга замыг хэлэлцэх арга зүйн дэмжлэг үзүүлэх зорилгоор хийгдэж байгаагаараа ач холбогдолтой юм.