Дархан сумын ИТХ-ын 7 дахь удаагийн сонгуулийн ээлжит 11 дүгээр хуралдаан /2019.05.22/ 09.00 цагт сумын хуралдааны танхимд  боллоо. Хуралдаанд ирвэл зохих 31 Төлөөлөгчөөс 28 нь ирж, 90.0 хувийн ирцтэй байв.  
       Хуралдаанаар:
1.    Дархан сумын 2019 оны төсвийн өр төлбөрийг барагдуулах тухай
2.    Дархан сумын зарим газрыг орон нутгийн тусгай хамгаалалтад авах тухай
3.  Дархан сумын 2019 оны газар зохион байгуулалтын төлөвлөгөөнд өөрчлөлт оруулах тухай асуудлуудыг Дархан сумын Засаг дарга Б.Азжаргал танилцуулж, Төлөөлөгчид асуулт тавьж, хариулт авч, хэлэлцүүлж буй асуудлуудтай холбогдуулан санал бодлоо илэрхийлж, холбогдох шийдвэрүүдийг гаргалаа.

     Монгол улсын Засгийн газрын 2019 оны 01 дүгээр сарын 16-ны өдрийн “Төрийн  албан хаагчийн албан тушаалын цалингийн сүлжээ, хэмжээг шинэчлэн тогтоох тухай” 24 дүгээр тогтоолоор 8-36.6 хувиар нэмэгдсэн, Эрчим хүчний зохицуулах хорооны 2018 оны 314 дүгээр тогтоол, Хот, суурины ус хангамж, ариутгах татуургын ашиглалт, үйлчилгээг зохицуулах зөвлөлийн 2017 оны 146 дугаар тогтоол, 2018 оны 92 дугаар тогтоол, Дархан-уул аймгийн эрчим хүчний зохицуулах зөвлөлийн 2018 оны 18/03 дугаар тогтоолуудаар тогтмол зардлын үнэ тариф нэмэгдсэнээр орон нутгийн болон тусгай зориулалтын шилжүүлгийн байгууллагуудын тогтмол зардал өссөн зэрэг нь сумын харъяа байгууллагуудын төсвийн өрийг үүсгэжээ.
     Төсвийн тухай хуулийн 34 дүгээр зүйлийн 34.2.2-т “Урьдчилан тооцоолох боломжгүй нөхцөл байдлын улмаас төсвийн орлого буурах, зарлага нэмэгдэж орон нутгийн төсөв алдагдалтай болох нөхцөл байдал бий болсон” гэж заасан нь  ИТХ-ын хуралдаанаар  хэлэлцүүлэх эрх зүйн үндэслэл болж буй юм.  
     2019 оны 1 дүгээр сарын 1-ээс Дархан сум орон нутгийн татварын бүрдүүлсэн орлогоосоо сумын хэмжээнд үйл ажиллагаа явуулдаг төрийн өмчийн бүх сургууль, цэцэрлэгийн тогтмол зардлыг санхүүжүүлдэг болсон. Ус, дулаан, цахилгаан зэрэг тогтмол зардлын үнэ нэмэгдсэнтэй холбоотой 153,8 сая төгрөгийн өр, төлбөр үүссэнийг орон нутгийн татварын орлогын бүрдүүлэлтээр шийдвэрлэлээ.
      Мөн орон нутгийн төсвөөс санхүүжилт авдаг 5 байгууллагын /Дархан сумын ИТХ, ЗДТГ, Хүүхдийн номын ордон, Музей, Төв номын сан/ цалин, НДШ-ийн 140,5 сая төгрөгийн өр үүссэнийг шийдвэрлэв. Түүнчлэн Дархан сумын төсвөөс Аймгийн төсөвт төвлөрүүлэх орлогыг нэмж 269,9 сая төгрөгөөр баталлаа.
     Дархан сумын зарим газрын ургамал, гол, усны нөөц газар болон байгалийн тодорхой төрлийн баялгийг хамгаалах зорилгоор Дархан сумын нутаг дэвсгэрийн 3 байршилд, тухайлбал Малчин багийн Хараа голын эрэг орчмын 1883 га, 5 дугаар баг, Малчин багийн Хөтөл хорооллын урд хэсгийн 16.4 га, 8 дугаар багийн Нарантолгойн 39.4 га газруудыг орон нутгийн тусгай хамгаалалтанд авах тухай асуудлыг хэлэлцэж, Төлөөлөгчдийн 100 хувийн саналаар баталлаа.
     “Дархан сумын 2019 оны тухайн жилийн газар зохион байгуулалтын төлөвлөгөө”-нд төсөвт байгууллагын зайлшгүй хэрэгцээнд эзэмшүүлэх 3, төсөл сонгон шалгаруулалтаар эзэмшүүлэх 2 нэгж газрыг нэмж, өөрчлөлт оруулан баталлаа.

ДАРХАН СУМЫН ИТХ-ЫН АЖЛЫН АЛБА