Аймгийн Засаг даргаас 2018 онд 13 сум, Зуунмод сумын Өрхийн эрүүл мэндийн төвийн 6 багт 185 сая төгрөгийн өртөг бүхий Мобайл технологийн иж бүрдлийг нийлүүлэхээр аймгийн шилжих үлдэгдлээс санхүүжилтийг шийдвэрлэсэн юм. Энэ хүрээнд сумдад Мобайл технологийн иж бүрдэл гардуулах үйл ажиллагаа зохион байгуулагдаж Аймаг, сумын удирдлагууд, Эрүүл мэндийн төвийн эрхлэгч нар, Медбуян ХХК-ний гүйцэтгэх захирал нар оролцлоо.

Мобайл технологийн иж бүрдэл нь зөөврийн ЭХО буюу хэт авиан оношилгооны аппарат, зүрхний цахилгаан бичлэгийн аппарат, даралтын аппарат, IPAD, таблет, сахар хэмжигч, холестерин хэмжигт аппарат зэрэг 7 төрлийн хэрэгслээс бүрдсэн, алслагдсан болон хөдөө орон нутгийн иргэдэд хүрч үйлчлэхэд зориулагдсан, зөөврийн зориулалтаар ашиглагддаг анагаах ухааны салбарт шинээр нэвтэрч буй дэвшилтэт технологи юм. Уг технологийг орон нутагт нэвтрүүлснээр урьдчилан сэргийлэх эрт илрүүлэг хийхэд хялбар болж, хамрах хүрээ нэмэгдэн, аливаа өвчнийг анхан шатны нэгжид эрт оношлох боломжтой болох юм.

Уг технологийг үлдсэн сумдад нэвтрүүлэх ажлыг эхлүүлэн 2019 оны Аймгийн эдийн засаг, нийгмийг хөгжүүлэх үндсэн чиглэлд эрүүл мэндийн чиглэлээр хэрэгжүүлэх үйл ажиллагааны төлөвлөгөөнд 11 сумыг мобайл технологийн иж бүрдлээр хангахаар тусган ажиллаж байна. Ингэснээр аймгийн хэмжээнд анхан шатны эрүүл мэндийн байгууллагуудад 100 хувь мобайл технологийг нэвтрүүлэн, алслагдсан болон орон нутгийн иргэдийн эрүүл мэндийн тусламж үйлчилгээний хүртээмж, чанарт ахиц гарч, дээд шатлалын эмнэлэгт цаг алдалгүй өвчнийг оношилж илгээх, өвчний хүндрэлээс сэргийлэх боломж бүрдэн, сумдын халдварт бус өвчний эрт илрүүлгийн хамрагдалт нэмэгдэх боломж бүрдэж байна.