Иргэдтэй уулзах үеэр Монгол Улсын Ерөнхийлөгч Х.Баттулга “Төв аймагт дэд бүтэц өндөр хөгжсөн. Мөн шинэ нисэх онгоцны буудлыг дагаад аялал жуулчлалыг хөгжүүлэх, аялал жуулчлалын бодлоготой уялдуулан бүтээн байгуулалт дэд бүтцийн асуудлыг шийдэх боломжтойг хэлж Удахгүй болох УИХ-ын Хаврын чуулганаар аялал жуулчлалын бодлогын талаар саналаа илэрхийлнэ. Тухайн үед аялал жуулчлалын бодлого илүү тодорхой болох байх. Хөшигтийн хөндийд аялал жуулчлалын бүс бий болж, ажлын байр олноор бий болох бүрэн боломж байдаг. Бидний хийсэн тооцоогоор 1-5 сая хүртэлх жуулчин татах боломжтой. Энэ бол бүтээн байгуулалтын олон төслийн ердөө багахан хэсэг нь” гээд төсөл хөтөлбөрүүдээ танилцууллаа.
Тэрээр иргэдийн үг, шүүмжлэл, санаа бодлыг түлхүү сонссон бөгөөд иргэд төрийн тэргүүнтэй хийх уулзалтад санал бодлоо чөлөөтэй илэрхийлж байлаа. Иргэдийн зүгээс аймгийн онцлогоос хамаарсан дэд бүтцийг бий болгож түүгээрээ дамжуулан ажиллах орчин нөхцлийг сайжруулж, шинээр ажлын байр бий болгох, цалин тэтгэвэр нэмэгдүүлэх, ажилгүйдлийг бууруулахад анхаарч ажиллахыг хүслээ. Залуучуудад ажлын байр дутагдалтай, цалин бага байгаа учраас ихэнх нь харь оронд ажиллахаар явж байгаа нь залуу гэр бүлийн амьдралд сөргөөр нөлөөлж, эрүүл мэндээрээ хохирч байгаа талаар болон монгол хүний үнэлэмж гадны хүмүүсээс доогуур байгаа учир гадаадаас ажиллах хүч олноор авчирч өндөр цалин өгдөг асуудлыг арилгах тухай иргэд ярьж байв.
Ерөнхийлөгч Х.Баттулга уулзалтын төгсгөлд иргэдээс ирүүлсэн санал гомдлыг УИХ, Засгийн газарт хүргэх, мөн Монгол Улсын Ерөнхийлөгчийн Тамгын газрын цаашдын бодлого, үйл ажиллагаанд тусгах бодолтой байгаагаа хэлсэн юм.