Архангай аймгийн Онцгой байдлын газраас “Сургуулийн цогц аюулгүй байдал” сургалтыг энэ онд гурван удаа бүсчлэн зохион байгуулсан. Гурван удаагийн бүсчилсэн сургалтанд сургуулийн захирал, нийгмийн ажилтан, багш нар нийт 120 гаруй хүнд нийт 64 цагийн дадлага сургалтанд хамрагдсан байна.

Тус сургалтыг Японы хүүхдийг ивээх сангаас хэрэгжүүлж буй “Зудад нэрвэгдсэн малчдын хүүхдүүдэд боловсролын дэмжлэг үзүүлэх, сургуульд түшиглэн гамшгийн эрсдэлийг бууруулах чадавхыг бэхжүүлэх нь” төслийн хүрээнд Архангай аймгийн 19 сумын 33 сургуулийг хамруулсан юм. Сургалтын үр дүнд Ерөнхий боловсролын сургуулиуд орчныхоо эрсдэлийг үнэлэн, гамшгийн эрсдэлийг бууруулах, сургуулийн гамшгаас хамгаалах төлөвлөгөөг боловсруулах аргазүйд суралцаж, улмаар сургуулийн багш ажилчид, сурагчдад гамшгаас урьдчилан сэргийлэх, эрсдэлийг үнэлэх, бууруулах, төлөвлөгөө боловсруулах мэдлэг чадварыг түгээн дэлгэрүүлж, сургууль тус бүр гамшгаас хамгаалах төлөвлөгөөгөө шинэчлэн боловсруулж баталгаажуулсан байна.

Энэхүү гурван удаагийн сургалтыг гамшгийн эрсдэлийг олон нийтийн оролцоотой бууруулах үндэсний хөтөлбөр, Монгол Улсын Шадар сайдын өгсөн үүргийн биелэлтийг хангаж Архангай аймгийн Засаг даргын тамгын газар, Онцгой байдлын газар, Японы хүүхдийг ивээх сангийн аймгийн салбар хамтран явуулжээ.
Архангай /МОНЦАМЭ/.