Төрийн албаны тухай хуулийн 17 дугаар зүйлийн 17.5-д “Хуульд өөрөөр заагаагүй бол ажил олгогч төрийн жинхэнэ албан тушаалын сул орон тооны талаар нийтэд мэдээлэх үүрэгтэй” гэсний дагуу Төв аймаг дахь Төрийн албаны зөвлөлийн Салбар зөвлөлөөс ирүүлсэн тус аймгийн нутгийн захиргааны зарим байгууллагуудын төрийн жинхэнэ албан тушаалын сул орон тоог нөөцөөс нөхөх захиалгыг нийтэд зарлаж, бүртгэл хийгдэж байна.
Зарлагдаж буй сул орон тоонд Төрийн холбогдох бусад байгууллагад ажиллаж байгаа төрийн жинхэнэ албан хаагчид болон төрийн жинхэнэ албан тушаалд анх орох иргэний нөөцөд бүртгэлтэй, тухайн албан тушаалд тавигдах боловсрол, мэргэжил, мэргэшил, туршлага, ур чадвар болон тусгай шаардлагыг хангасан, энэ албан тушаалд ажиллахыг хүссэн Монгол Улсын иргэн санал хүсэлтээ гаргана.
Зарлагдсан төрийн жинхэнэ албан тушаалын сул орон тоонд ажиллахыг хүссэн иргэд тус аймгийн Засаг даргын Тамгын газарт 2017 оны 11 дүгээр сарын 15-аас 24-ний өдрийн 10.00-13.00, 14.00-17.00 цагийн хооронд өөрийн биеэр ирж бүртгүүлнэ.
Иргэд бүртгүүлэхдээ өөрийн боловсрол, мэргэжил, мэргэшил, туршлага, ур чадвар, тусгай шаардлагын талаар дэлгэрэнгүй мэдээллийг үнэн зөв, товчилсон нэр, томьёо хэрэглэхгүй мэдээлэх шаардлагатай. Мөн холбоо барих утасны дугаар, гэрийн хаяг, е-майл хаяг зэргийг тодорхой дурдана.
- Бүртгүүлэхэд шаардлагатай бичиг баримт:.
- 1. Тухайн албан тушаалд ажиллахыг хүссэн өргөдөл
- /Иргэн ажилд орохыг хүссэн өргөдөлдөө төрийн албаны мэргэшлийн шалгалтыг хэдэн оны хэдэн сард хаана, ямар байгууллага, ажлын байранд өгч тэнцсэн тухай дэлгэрэнгүй мэдээллийг бичнэ/
- 2. Төрийн албан хаагчийн анкет
- /Төрийн албан хаагчийн анкетыг маягт №1-ийн дагуу бүрэн бөглөсөн байх/
- 3. Боловсролын түвшинг тодорхойлсон баримт бичиг /диплом/-ийн эхийг нотариатаар гэрчлүүлсэн хуулбарын хамт
- /Гадаадад их, дээд сургууль төгссөн бол баталгаат орчуулгын газраар Монгол хэл лүү хөрвүүлсэн байх/
- 4. Мэргэшүүлэх сургалтад хамрагдсаныг гэрчлэх баримт бичгийн эхийг нотариатаар гэрчлүүлсэн хуулбарын хамт
- 5. Иргэний үнэмлэхний эх, хуулбарын хамт
- 6. “4х6”-ийн хэмжээний цээж зураг 1 хувь
- 7. Ажилласан хугацаа болон ажил эрхлэлтийг гэрчлэх баримт /Нийгмийн даатгал, хөдөлмөрийн дэвтэр/-ын эх, хуулбарын хамт