Дархан-Уул аймгийн Засаг даргын 2017-2020 оны үйл ажиллагааны хөтөлбөрийн 6.2.2-ийн 2 дугаарт эмнэлгийн тусламж үйлчилгээг үйлчлүүлэгчдэд чирэгдэлгүй, хүлээгдэлгүй авах нөхцөлийг бүрдүүлэх зорилгоор Шилэн эмнэлэг төслийг хэрэгжүүлэхээ тусгагдсан. Энэ дагуу тус төслийн эхний шат хэрэгжиж эхэлсэн бөгөөд өнөөдөр /2017.09.22/ аймгийн Засаг даргын орлогч А.Түвшинбат, Нийгмийн бодлогын хэлтсийн дарга Б.Цасчихэр, Эрүүл мэндийн газрын дарга Б.Батцэнгэл нар тус төслийн явцтай танилцлаа. Эхний ээлжид мэдрэл, 103, хүлээн авах, амаржих тасаг, захиргаа зэрэг нийт 32 ширхэг камерыг тендерт шалгарсан “Easy Net” ХХК байршуулаад байна. Шилэн эмнэлэг төслийг хэрэгжүүлснээр амбулатори, тасаг нэгжийн үйлчилгээнд цахим бүртгэл, мэдээлэл хяналтын орчин нөхцөлийг бүрдүүлж, тусламж үйлчилгээний менежментийг сайжруулж, шуурхай ил тод нээлттэй байдлыг хангах, тусламж үйлчилгээний чирэгдлийг бууруулах үр дүнтэй юм.