Эрүүл мэндийн сайд А.Цогцэцэг шинээр боловсруулж батлуулсан хууль эрх зүй, хөтөлбөрүүдээ аймгийн эрүүл мэндийн байгууллагын эмч, сувилагчдад тайлагнаж цаашид хийж хэрэгжүүлэхээр төлөвлөсөн ажлаа танилцууллаа. Цаг үеэ олсон олон чухал бодлогын бичиг баримтуудыг боловсруулан шийдвэрлэсэн эрүүл мэндийн сайдад эмч эмнэлгийн ажилчид талархал илэрхийлж эрүүл мэндийн тусламж үйлчилгээг нэмэгдүүлэх, эмч ажиллагсдын цалин нийгмийн хамгааллын асуудлыг шийдвэрлэх, Эрүүл мэндийн хуулийн дагуу 3-5 жилд 1 удаа авдаг тэтгэмжийг өгөхгүй байгаа асуудлыг хууль эрх зүйн хүрээнд нь шийдвэрлэж өгөхийг хүслээ. Мөн энэ үеэр “Эрүүл мэндийн тэргүүний ажилтан” цол тэмдгээр Н.Өнөрбаяр, Ш.Баярмаа, Д.Саранчимэг, У.Цэдэвдагва, Д.Батцэцэг нарыг шагнасан бол Эрүүл мэндийн яамны “Хүндэт жуух” бичгээр лаборант П.Эрдэнэ-Очир, сувилагч Б.Пүрэвсүрэн, С.Наранчимэг Л.Эрдэнэчимэг нарыг шагнаж урамшуулсан бөгөөд Аймгийн Нэгдсэн эмнэлэгт мэс заслын хажуугийн гэрэл, увч, памп зэрэг тоног төхөөрөмжийг хүлээлгэн өгсөн юм.