Франц улсын “Аксион Монголи” төрийн бус байгууллагаас Дархан-Уул аймгийн Эрүүл мэндийн газар болон Нэгдсэн эмнэлгийн нүдний кабинетад нэн хэрэгцээтэй тоног төхөөрөмжүүдийг хандивлажээ. Үүнд Nidek 2000 auto contact tonometr буюу нүдний даралтыг хэмждэг аппарат, nidek auto refractometer төхөөрөмж буюу нүдний харааг шалгаж хугарлыг тогтоодог тоног төхөөрөмжийг өгсөн байна. Энэхүү төрийн бус байгууллага өмнө нь Улаанбаатар хотын зарим дүүрэг, аймгийн төвүүдэд нүдний эмгэг оношлох, эмчлэх, дурангийн хагалгаа хийх, тоног төхөөрөмж, эмч нарын боловсролыг сайжруулах зэрэг тусламжийн үйл ажиллагаа явуулдаг ажээ. өнөөдөр аймгийн Засаг даргын орлогч А.Түвшинбат, Нийгмийн бодлогын хэлтсийн дарга Н.Цасчихэр нар Франц улсын эмч нарт хүндэтгэл үзүүлж аймгийн Засаг даргын жуух бичгээр шагнаж урамшууллаа. Нүдний кабинетын эмч нарын хэлж байгаагаар эдгээр хэрэгслүүдийг авснаар үзлэг оношилгоо хийх бүрэн боломжтой болж байгаа ажээ.