Олон Улсын Хүүхдийн эрхийг хамгаалах өдрийг тохиолдуулан Монгол Улсын Ерөнхийлөгчийн зарлигаар алдарт эхийн 1, 2 дугаар одонгоор шагнуулсан ээжүүдэд дүүргийн удирдлагууд одонг нь гардуулав.
Энэ удаа дүүргээс 19 ээж нэгдүгээр одон, 292 ээж хоёрдугаар одонгоор шагнууллаа. Одон хүртсэн ээжүүдээс хамгийн залуу нь 25 настай 14 дүгээр хорооны иргэн Д.Чанцалдулам, хамгийн ахмад нь 86 настай 8 дугаар хорооны иргэн Г.Тогоо гуай байлаа.
Үйл ажиллагааны үеэр дүүргийн Засаг дарга Х.Болормаа алдарт ээжүүддээ баяр хүргэж “...Монгол бүсгүйчүүд олон хүүхэд төрүүлж өсгөн хүмүүжүүлэхийн зэрэгцээ өрх гэрээ сайн сайхан байлгахад бүхий л сэтгэл зүрхээ зориулж байдаг . Одон хүртсэн ээжүүддээ болон гэр бүл, үр хүүхдэд тань Олон улсын Хүүхдийн эрхийг хамгаалах өдрийн баярын мэндийг хамтатган хүргэе” гэв.
Сүхбаатар дүүрэгт алдарт эхийн одонтой 6628 ээж байдаг. Тэгвэл энэ тоо өнөөдөр 311-ээр нэмэгдлээ.
Та бүхэн сайхан баярлаарай.
